ການຂໍອະນຸຍາດດຳເນີນທຸລະກິດ​ຂອງ​ບໍ​ລິ​ສັດ​ບໍ​ລິ​ຫານກອງ​ທຶນ​ເພື່ອ​ການ​ລົງ​ທຶນ

ຜູ້​ທີ່​ມີ​ຈຸດ​ປະ​ສົງ​ຂໍ​ອະ​ນຸ​ຍາດ​ດໍາ​ເນີນ​ທຸ​ລະ​ກິດ​ຂອງບໍລິສັດບໍລິຫານກອງທຶນເພື່ອການລົງທຶນ​ຕ້ອງ​ມີ ເງື່ອນ​ໄຂຕາມທີ່ໄດ້ກໍານົດໄວ້ໃນ ກົດໝາຍວ່າດ້ວຍຫຼັກຊັບ (ສະບັບປັບປຸງ) ມາດຕາ 72. ສໍາ​ລັບ ບໍ​ລິ​ສັດ​ບໍ​ລິ​ຫານກອງ​ທຶນ​ເພື່ອ​ການ​ລົງ​ທຶນ​​ຕ່າງ​ປະ​ເທດ​ສາ​ມາດ​ສ້າງ​ຕັ້ງ​ ແລະ ບໍ​ລິ​ຫານກອງ​ທຶນ​ເພື່ອ​ການ​ລົງ​ທຶນຢູ່ ສ​ປ​ປ ລາວ ກໍ​ໄດ້.

ສໍາລັບ ບໍລິສັດບໍລິຫານກອງທຶນເພື່ອການລົງທຶນຕ່າງປະເທດ ທີ່ບໍ່ມີສໍານັກງານທີ່ຕັ້ງຢູ່ ສປປ ລາວ ຫາກມີຈຸດປະສົງເຂົ້າມາດໍາເນີນທຸລະກິດ ສ້າງຕັ້ງ ແລະ ບໍລິຫານກອງທຶນເພື່ອການລົງທຶນຢູ່ ສປປ ລາວ ຕ້ອງ ມີເງື່ອນໄຂ ດັ່ງນີ້:

1.   ໄດ້ຮັບການ ສ້າງຕັ້ງ ແລະ ເຄື່ອນໄຫວ ຢ່າງຖືກຕ້ອງຕາມທີ່ໄດ້ກໍານົດໄວ້ໃນ ກົດໝາຍ ແລະ ລະ ບຽບການທີ່ກ່ຽວຂ້ອງຂອງ ຕ່າງປະເທດ;

2.   ເປັນບໍລິສັດບໍລິຫານກອງທຶນເພື່ອການລົງທຶນ ທີ່ຢູ່ໃນບັນຊີລາຍຊື່ຂອງປະ​ເທດ​ທີ່​ເປັນ​ສະມາຊິກ​ຂອງອົົງການຄຸ້ມຄອງວຽກງານຫຼັກຊັບສາກົນ (IOSCO) ຫຼື ຂອງ​ປະ​ເທດທີ່ມີສາຍພົວພັນຮ່ວມມື ໂດຍການເຊັນບົດບັນທຶກຄວາມເຂົ້າໃຈຮ່ວມກັບອົງການຄຸ້ມຄອງວຽກງານຫຼັກຊັບຂອງ ສປປ ລາວ;

3.   ມີສັນຍາຮ່ວມທຸລະກິດຮ່ວມກັບ ບໍລິສັດບໍລິຫານກອງທຶນເພື່ອການລົງທຶນ ທີ່ສ້າງຕັ້ງ ແລະ ດໍາເນີນທຸລະກິດຢູ່ ສປປ ລາວ;

4. ໄດ້ຮັບການອະນຸຍາດຈາກ ສໍານັກງານຄະນະກໍາມະການຄຸ້ມຄອງຫຼັກຊັບ.