ໃນວັນທີ 17 ມີນາ 2026, ທີ່ເມືອງຕຸຍຮວ່າ, ແຂວງດັກລັກ, ສສ. ຫວຽດນາມ, ໄດ້ມີການຈັດກອງປະຊຸມພົບປະສອງຝ່າຍ ປະຈຳປີ ຄັ້ງທີ 14 ລະຫວ່າງ ສຳນັກງານຄະນະກຳມະການຄຸ້ມຄອງຫຼັກຊັບ (ສຄຄຊ) ນຳໂດຍ ທ່ານ ນາງ ແພງສີ ແພງເມືອງ, ຫົວໜ້າ ສຄຄຊ ແລະ ຄະນະກຳມະການຄຸ້ມຄອງຫຼັກຊັບ ສສ.ຫວຽດນາມ (ຄຄຊ ສສ.ຫວຽດນາມ) ນຳໂດຍ ທ່ານ ຮ່າ ຢຸຍ ຕຸ່ງ, ຮອງປະທານ ຄຄຊ ສສ.ຫວຽດນາມ, ພ້ອມດ້ວຍພະນັກງານທີ່ກ່ຽວຂ້ອງຈາກທັງ 2 ຝ່າຍ.

    ກອງປະຊຸມຄັ້ງນີ້ ໄດ້ດຳເນີນພາຍໃຕ້ບັນຍາກາດແຫ່ງສາຍພົວພັນມິດຕະພາບອັນເປັນມູນເຊື້ອ, ທີ່ໄດ້ຕີລາຄາຄືນເຖິງພາບລວມຂອງການຮ່ວມມືຍຸດທະສາດຂອງທັງສອງຝ່າຍ, ຈາກການພົວພັນແລກປ່ຽນຂໍ້ມູນຂັ້ນພື້ນຖານໃນໄລຍະເລີ່ມຕົ້ນ, ປັດຈຸບັນໄດ້ກ້າວເຂົ້າສູ່ການຍົກລະດັບຂີດຄວາມສາມາດທາງດ້ານເຕັກນິກວິຊາການ, ການແບ່ງປັນປະສົບການ ແລະ ການຮ່ວມມືໃນໂຄງການລະດັບຍຸດທະສາດ ເຊິ່ງໄດ້ສະແດງໃຫ້ເຫັນເຖິງວິໄສທັດຮ່ວມກັນ ໃນການພັດທະນາຕະຫຼາດທຶນຂອງທັງສອງປະເທດໃຫ້ເຕີບໃຫຍ່ເຂັ້ມແຂງຢ່າງຕໍ່ເນື່ອງ.

    ພ້ອມດຽວກັນນີ້, ທັງສອງຝ່າຍຍັງໄດ້ແລກປ່ຽນສະພາບຂອງການພັດທະນາຕະຫຼາດທຶນໃນປີ 2025 ທີ່ຜ່ານມາ, ພ້ອມທັງຕີລາຄາສູງຕໍ່ໝາກຜົນການຮ່ວມມືຮ່ວມກັນໃນປີຜ່ານມາ ໂດຍສະເພາະການສະໜັບສະໜູນຢ່າງຕັ້ງໜ້າຂອງ ຄຄຊ ສສ.ຫວຽດນາມ ໃນການຍົກລະດັບບຸກຄະລາກອນໃຫ້ແກ່ຝ່າຍລາວ. ພ້ອມດຽວກັນນັ້ນ, ສອງຝ່າຍຍັງໄດ້ຕົກລົງເຫັນດີຮ່ວມກັນໃນການກຳນົດແຜນການຮ່ວມມືປະຈໍາປີ 2026, ໂດຍຈະສຸມໃສ່ການສືບຕໍ່ແລກປ່ຽນບົດຮຽນທາງດ້ານນະໂຍບາຍ, ການຍົກລະດັບວຽກງານຄຸ້ມຄອງ ໂດຍສະເພາະແມ່ນການຮ່ວມກັນຊຸກຍູ້ໂຄງການຮ່ວມມື 3 ຝ່າຍ (ລາວ-ຫວຽດນາມ-ລຸກຊຳບວກ) ໄລຍະໃໝ່ ປີ 2026-2030 ເພື່ອແນໃສ່ພັດທະນາຕະຫຼາດທຶນລາວໃຫ້ມີຄວາມທັນສະໄໝ, ຫຼາກຫຼາຍ ແລະ ເຊື່ອມໂຍງເຂົ້າກັບມາດຕະຖານສາກົນເທື່ອລະກ້າວ.